Gloriant

(ca. 1400-1420)–Anoniem Gloriant– rechtenstatus



[Folio 213ra]
Gloriant Een abel spel ende een edel dinc van den hertoghe van Bruuyswijc, hoe hi wert minnende des roede lioens dochter van Abelant Ic bidde gode den oversten vader, Dat hi ons moet bewaren alle gader. Heren ende vrouwen, groet ende clene, Ic bidde u allen int ghemene, 5[regelnummer] Dat ghi wilt maken een ghestille Ende merct daer na diet merken wille. Men sal u hier spelen een suverlijc dinc Van enen hoghen jonghelinc, Die hertoghe was van Bruuyswijc. 10[regelnummer] Hem dochte dat niemen sijns ghelijc Op eertrike niet vinden en mochte, Ende sprac uut overmoedege gedochte Roemeghe worden ende ombekint, Daer dicke die menege es bi gescint. 15[regelnummer] Want wie dat hem te hoghe beroemt, Als dan die saken anders comt, Soe wort hi bi den roeme ghescant. Alsoe gevielt desen hoghen wigant; Al was hi rike ende hoge geboren, 20[regelnummer] Uut groten roem soe quam hem toren. Om dat hi sprac roemeghe wort,
[Folio 213rb]
Wert vrouwe Venus op hem ghestoert, Soe dat sijt namaels op hem wrac, Die roemeghe worde, die hi sprac, 25[regelnummer] Alsoe ghi nu hier selt bescouwen. Daer omme radic heren ende vrouwen, Dat hem nieman te hoghe en sal beroemen, Want daer es selden ere af comen. Te hoghen roem en wert nie ghepresen. 30[regelnummer] Nu bidden wi gode, die wert gheslegen Ane een cruce om onsen sonden, Dat wi alle salich werden vonden Te Josepat in dat soete dal, Daer God sijn oerdeel besitten sal. 35[regelnummer] Dies biddic Maria der coninghinnen. Nu hoert ende swijcht, wi gaen beghinnen. Gheraert, shertogen oem. Waer sidi, lieve vrient Godevaert? Godevaert. Ic ben hier, her Gheraert; Nu segt mi, wats die raet? Gheraert. 40[regelnummer] Godevaert, het en dochte mi niet quaet, Dat ons hertoghe, die hoghe baroen, Enen huwelijc woude doen Ende dat hi nemen woude een wijf. Hi heeft soe scone vromen lijf 45[regelnummer] Ende es een stout jonc man van daghen: Hadde hi een wijf, si mochte draghen Kindren, dat ware des lants profijt. Hets een lantscap groet ende wijt, Het ware scade, bleeft sonder gheboert. 50[regelnummer] Daer omme hebbic u gheroepen voert, Dat ghi ons daer toe sout gheraden. Godevaert. Heer Gheraert, dat en mochte niet scaden, Daer hebbic oec omlancs om ghepeinst; Maer ic segghe u al ongheveinst, 55[regelnummer] Heer Gheraert, ghi sijt des hertogen oem,
[Folio 213va]
Daer omme moetti sijns nemen goem Meer dan ic ofte die hem niet en bestaet. Gheraert. Wattan, Godevaert, ghi moet ons raet Gheven, hoe dat wi varen moghen. 60[regelnummer] Dlantscap waers in goeden hoghen, Hadde hi een wijf ende kinder daer bi. Godevaert. Heer Gheraert, daer omme selen wi, ic ende ghi, Onder ons beiden daer na spien. Ic weet ons wel na ene te sien, 65[regelnummer] Die men hem gheven sal herde gherne. Dats die coninc van Averne Heeft een dochter noyael ende goet, Ende die oec draecht enen reinen moet Ende hevet enen goeden aert. Gheraert. 70[regelnummer] Sekerlijc, heer Godevaert, Die huwelijc dochte mi goet. Die coninc van Averne es een edel bloet Ende die altoes binnen sinen daghen Sine wapen eerlijc heeft ghedraghen, 75[regelnummer] Ende sijn vorders van goeder aert. Sekerlike, Godevaert, Desen huwelijc dochte mi goet ghedaen. Godevaert. Laet ons dan toten hertoghe gaen Ende laet ons hem dit legghen te voren, 80[regelnummer] Dan soe moghen wine spreken horen, Hoe dat hi beraden si. Nu willen wi gaen, ic ende ghi, Ende laet ons horen wat hi seght.
[Folio 213vb]
Staet sijn herte daer toe gheweght, 85[regelnummer] Soe willen wi thuwelijc maken dan. Waer sidi, hertoge, hoghe gheboren man, Edel hertoghe van Bruuyswijc? Die hertoghe. Sijt willecome, oem, sekerlijc Ende minen lieven vrient Godevaert! 90[regelnummer] Nu segt mi, lieve oem Gheraert, U begherte, het sal u ghescien. Gheraert. Gloriant neve, dat souden wi gerne sien, Dat ghi wout huwelijc doen. Wi saghent gerne, edel baroen, 95[regelnummer] Ende oec Bruuyswijc, u selves lant. Die hertoghe. Oem Gheraert, hoghe gheboren wigant, Daer toe en benic noch niet gestelt. Ic bidde u, dat ghi mi niet en quelt, Want daer en willic niet af horen; 100[regelnummer] Ic en weet gheen wijf op eerde gheboren, Daer ic met woude leiden minen tijt. Gheraert. Neve, ghi moetet om des lants profijt Doen alsoe wel als om u selves lijf; Ghi selt nemen moeten een wijf, 105[regelnummer] Neve, om kinder daer van te crighen. Godevaert. Nu en canic langer niet gheswighen, Edel hertoge, hoghe baroen, Ghi moetet om uus lants wille doen Om kinder te crighene, al Geraert seght. 110[regelnummer] Hets een dinc dat men niet en pleght, Sonder vrouwe te bliven soe groten here. Ghi souter u lantscap met onteren,
[Folio 214ra]
Edel here, stoerfdi sonder gheboert; Daer soude op risen een groet discoert, 115[regelnummer] Elc souts die naeste willen sijn; Ghi sout beraden groten pijn Den edelen lande van Bruuyswijc. Die hertoghe. Godevaert, Godevaert, sekerlijc, Dese redene es te male om niet. 120[regelnummer] Mijn herte gheen wijf soe gherne en siet, Daer ic om gave een haer. In weet gheen wijf, dies werdich waer Dat icse maken soude mijn vrouwe. Godevaert. Here, wacht dat u noch niet en rouwe, 125[regelnummer] Dat ghi sprect dus domme woert. Wort vrouwe Venus op u ghestoert, Si sal u noch maken mat. Gheraert. Gloriant neve, verstaet wel, dat Samsoen, die was soe sterc, 130[regelnummer] Bedroghen wert bider minnen werc, Ende oec Apsloen, die scoen, Ende die wise coninc Salomoen Bleven bi minnen al bedroghen. Dits emmer waer ende niet gheloghen: 135[regelnummer] Vrouwen minne brachse tonder. Die hertoghe. Seker, oem, dat heeft mi wonder, Maer si waren vol geckerdiën. Oem Gheraert van Noermandiën, Daer quamen ander saken bi: 140[regelnummer] Sine waren haers selfs, van herten niet vri, Si bleven aen vrouwen al versmoert. Ic en weet gheen wijf van soe hoger geboert, Dat icker seker om gave twee peren. Gheraert. Seker, neve, dats niet dan sceren
[Folio 214rb]
145[regelnummer] Mede te makene, soe wie dat hoerde, Ende ic en hoerde nie soe domme woerde Spreken enen hoghen man. Seker, neve, ghi moet nochtan Huwen om des lants profijt. Die hertoge. 150[regelnummer] Seker, oem, dien tijt En sal nemmermeer man bescouwen, Dat ic enech wijf sal trouwen, Die nu op eertrike leeft Of die die werelt binnen heeft; 155[regelnummer] Want ic hebbe soe vromen lijf, Soudic dat legghen ane ene wijf, Soe waric emmer buten kere, Ende oec benic soe groten here Vanden lande van Bruuyswijc. 160[regelnummer] En es gheen wijf op eerde mijns gelijc, Ic wil bliven mijns selves man. Gheraert. Bi den vader die mi ghewan, Nu en hoerdic nie soe domme tale. Seker, neve, en voeght u niet wale, 165[regelnummer] Dat ghi den vrouwen sprect soe naer. Godevaert. Seker, Gheraert, ghi segt waer: Den vrouwen heeft hi wel na ghesproken, Maer het sal noch werden ghewroken, Dat weetic wel in rechter trouwen; 170[regelnummer] Een lieflijc aensien van eenre vrouwen Sal hem noch duncken medesine. Die hertoge. Oem Gheraert, bider trouwen mine, Dat en seldi gheleven nemmermeer. Mijn herte es vaster dan een weer 175[regelnummer] Ghestelt al op mijn scone lijf. Ic en weet op eertrike gheen wijf, Die mi dunct dat mijns werdich ware; Mijn herte dat vlieght ghelijc den are
[Folio 214va]
Boven alle vrouwen minne. 180[regelnummer] Soudic dan mijn herte ende vijf sinne Legghen an eens wijfs bedwanc? Van gode moetic hebben ondanc, Of dat emmermeer ghesciet. Gheraert. Gloriant neve, soe waert om niet, 185[regelnummer] Dat hoeric wel, datter ic om pine. Maer wacht, dat u noch niet en scine, Dat ghi sprect dus dommelijc. Florentijn die maghet. Ay, en mach op eertrijc Mijns ghelijc niet gheboren sijn 190[regelnummer] Ende die ware vander naturen mijn Ende ghelijc mi van moede! Ic en sach nie man soe rijc van goede, Dien ic woude hebben tot enen man, Noch amerael, noch soudan, 195[regelnummer] Noch nie man soe hoghe gheboren, Die mi van huwelijc leide te voren, Dat ic sine minne woude draghen. Dier ghelijc hebbic horen ghewaghen Van enen man in kerstenrijc, 200[regelnummer] Ende es hertoghe van Bruuyswijc Ende van herten alsoe proeys Ende van moede soe oerghelyoes, Dat hi oec gheen wijf en mint. Wi sijn beide ghelijc ghesint, 205[regelnummer] Dat segt mi mijn herte te voren, Ende onder éne planete gheboren Ende hebben beide gader éne nature. Nu salic hem sinden ene figure, Een beelde ghemaect na mijn anschijn; 210[regelnummer] Eest dat wi twee ghelike sijn, Sijn herte sal hem verwandelen dan. Bi minen god Tervogan, Ic sal horen wat hi sueght. Mijn herte dat staet te hem ghevueght, 215[regelnummer] Om dat hi van herten es soe fier. Waer sidi, mijn bode Rogier? Comt tote mi, ic hebts te doen.
[Folio 214vb]
Rogier. O edel vrouwe, bi Mahoen, Segt mi, wat wildi hebben ghedaen? Florentijn die maghet. 220[regelnummer] Rogier, ghi moet haestelec gaen Toten hertoghe van Bruuyswijc, Ende es gheleghen in kerstenrijc Ende es gheheten Gloriant. Ghi selt hem gheven in sine hant 225[regelnummer] Dese figure, den deghen fijn, Ende segt hem, dat icse na danschijn mijn Hebbe doen maken wel ghelijc, Ende dat ghi comt uten rijc Vander stat van Abelant, 230[regelnummer] Ende segt oec den hoghen wigant, Dat ic hem bidde in rechter trouwen, Dat hi in deere van allen vrouwen Dese figure wille anesien. Hem sal sere verwonderen van dien, 235[regelnummer] Wat ic daer met menen mach. Ende segt hem, dat ic nie man en sach, Daer ic mede deilen woude mijn lijf, Ende segt hem oec al sonder blijf, Dat hi es mijn vader, die hoghe baroen, 240[regelnummer] Van Abelant die rode lioen, Ende hoert ende merct ende swijcht ende heelt, Ende verstaet wel dat hi u beveelt, Ende brinct mi die boetscap dan. Rogier. Bi minen god Tervogan, 245[regelnummer] Joncfrouwe, dese boetscap wert gedaen; Ic wille met haesten daerwert gaen. Mamet ende Apolijn Die moeten bewaren die vrouwe mijn, Die mi heeft ghesent tote hier. 250[regelnummer] Edel here, ic ben een metselgier Eender joncfrouwen noyael ende goet; Si bidt u op gherechter oetmoet, Dat ghi wilt anscouwen dese figure; Si es na die scoenste creature
[Folio 215ra]
255[regelnummer] Ghemaect, die men vint in eertrike, Ende haren anschijn alsoe ghelike, Al waer sijt selve die vrouwe weert; Si es van hare doghet vermeert Ende oec van haren hoghen moet. Die hertoghe. 260[regelnummer] Metselgier, nu maect mi vroet, Wie es die joncfrou? doet mi becant. Rogier. Dats Florentine van Abelant, Die edel joncfrou ende die rike. Men vint in heydenesse niet haers gelike, 265[regelnummer] Soe noyael noch soe scone van live: Men vinter in eertrike niet vive, Die gheliken der vrouwen mijn: Si en mochte niet noiaelder sijn, Hovescher noch bat gheraect, 270[regelnummer] Ende van haren live soe volmaect Ende haren moet soe eerlijc dracht; En was nie man op eerde verdacht, Soe rike noch soe hoghe gheboren, Die hare van minnen leide te voren, 275[regelnummer] Dat si worden woude sijn wijf. Si heeft te male een reine lijf Ende enen vader van hoghen doen, Dats van Abelant die rode lioen Es haer vader, des sijt vroet. Die hertoghe. 280[regelnummer] Du best een bode ghetrouwe ende goet, Dat hoeric herde wel ane di. Nu staet op ende gaet met mi, Ic sal di wel te ghemake doen. Rogier. Ic doet gherne, edel baroen. Die hertoghe. 285[regelnummer] Nu biddic gode, diet wel vermach,
[Folio 215rb]
Dat hi mi late gheleven den dach, Dat ic dese joncfrou noch anscouwen moet, Die mi dese grote vrienscap doet Ende heeft mi die figure ghesent, 290[regelnummer] Dit anschijn na thare gheprent. Ay god, ende mach haer anschijn Ghelijc deser figure sijn, Sone saghic op eerde nie haers ghelijc; Si ware wel weert in Bruuyswijc 295[regelnummer] Te sine ene vrouwe ende ene hertoghinne. God, daer alle doghet es inne, Die gheve haer altoes goeden morghen. Ay god, wat consten dracht si verborghen Int herte, dies benic wijs. 300[regelnummer] Si draghet van abelheiden een rijs Boven allen vrouwen, die ic nie sach. Ay, god die gheve haer goeden dach, Die mi ghesent heeft desen pant. Rogier. O hoghe gheboren wigant, 305[regelnummer] Ic hebbe mine boetscap ane u ghedaen; Nu willic weder keren gaen Toter joncfrouwe Florentijn. Die hertoghe. Rogier, Rogier, nu soe moetti sijn Goet ende ghetrouwe in alder stont 310[regelnummer] Ende draghen enen hoveschen mont: Wat ghi hoert ende wat ghi siet, Dat en seldi voerder vertrecken niet, Rogier, dan men u beveelt: Hi es te prisene, die wel heelt. 315[regelnummer] Lieve Rogier, nu sijt ghetrouwe Ende groet mi sere die scone joncfrouwe Ende segt hare in ware dinc, Dat nie wijf van mi en ontfinc Groete meer dan si allene. 320[regelnummer] Maer om dat si es soe rene Ende soe noiael van haren live, Soe segt den edelen sconen wive, Dat si mi houde hare reynecheit Tot onser beiden salicheit; 325[regelnummer] Ic sal hare oec ghestadich sijn.
[Folio 215va]
Rogier. O edel here, bi Apolijn, Si bat mi uter maten sere, Dat ic u vraghen soude, edel here, Of si u emmermeer soude moghen sien. Die hertoghe. 330[regelnummer] Rogier, dat sal hare ghescien. Eer dat lijdt die seven weken, Salic die joncfrou sien ende spreken, Op dat mi god behout mijn lijf; Ende groet mi sere dat edel wijf, 335[regelnummer] Die god altoes bewaren moet. Rogier. Nu willic gaen lopen metter spoet. Mamet ende Apolijn Ende Mahoen ende Jupetijn Die moeten u gheven goeden dach. Florentijn die maghet. 340[regelnummer] Rogier, nu doet mi ghewach: Hebstu ghesien den hoghen man? Rogier. Jaic, vrouwe, bi Tervogan, Hets een man van hogher weerde. Ic weet wel, dat op die eerde 345[regelnummer] Sijns ghelike niet en leeft, Noch die werelt binnen en heeft Van scoenheden noch van hoghen moede. Hi es een man van edelen bloede, Rijc van haven, groet van gheslachte 350[regelnummer] Ende edel gheboren van groter machte, Ende die oec hout een rikelijc hof. Ic en hoerde nie soe groten lof Gheven als men gheeft Gloriant. Hi es te male een coen wigant 355[regelnummer] Ende ontsien van allen man. Florentijn die maghet.
[Folio 215vb]
Rogier, Rogier, nu segt mi dan: Wat groeten heeft hi mi ghesent? Rogier. O edel vrouwe wide bekent, Hi seide mi in ware dinc, 360[regelnummer] Dat nie wijf van hem en ontfinc Groete meer dan ghi allene, Ende bidt u, edel vrouwe rene, Dat ghi hem hout u suverheit Tot uwer beiden salicheit; 365[regelnummer] Hi sal u oec ghestadich sijn. Florentijn die maghet. Segt mi, Rogier, bi Apolijn, Ende seide hi niet, dat hi mi gerne soude sien? Rogier. Jahi, vrouwe, dat sal u ghescien. Noch eer liden seven weken, 370[regelnummer] Sal hi u sien ende daer toe spreken: Alsoe seide mi die wigant Ende ghelovet mi in mine hant Ende swoert bi der trouwen sijn. Florentijn die maghet. Bi minen god Apolijn, 375[regelnummer] Na dien tijt soe salic wachten. Mocht noch comen na mijn achten, Dat mi dat noch mochte gescien, Dat ic den hertoghe mochte anesien, Soe waric alle sorghen vri. 380[regelnummer] Rogier, staet op ende gaet met mi; Ghi hebt u boetscap wel bewaert. Gloriant die hertoghe. Waer sidi, edel oem Gheraert, Van Normandiën hoghe baroen? Uus raets hebbic nu wel te doen, 385[regelnummer] Edel oem, hoghe wigant.
[Folio 216ra]
Gheraert. Wat segdi, neve Gloriant, Wat sijn die dinghen die u ghebrect? Die hertoghe Gloriant. Edel oem, dat mi int herte stect, Dies ic niet langher en can ghehelen. 390[regelnummer] Gherechte minne doet mi soe quelen, Dat mi costen sal mijn lijf. Ic minne soe sere een edel wijf, Dat ic ure no nacht no dach Gherusten no gheslapen niet en mach, 395[regelnummer] Sent dat ic ierst die minne began. Gheraert. Dats dat ic niet en can Gheloven, soe wats ghesciet, Dat u edel herte verdriet Lijdt om enech wijf die leeft, 400[regelnummer] Of die die werelt binnen heeft; Dies en canic gheloven twint. Die hertoghe. Och edel oem wide bekint, Ic lide wel ende gheve mi sculdich, Dat ic hier voermaels menechfuldich 405[regelnummer] Dommelike hebbe ghesproken. Edel oem, dat wert nu al gewroken, Dat ic sprac die domme woert; Dies es vrouwe Venus op mi ghestoert Ende heeft mi int herte gheraect, 410[regelnummer] Ende enen dienere der vrouwen ghemaect, Ende leert mi gaen der minnen pas. Gheraert. Ende hoe willic gheloven das? Ghi draghet soe hoverdeghen moet, Ghi maket mi ende Godevaerde vroet, 415[regelnummer] Dat gheen wijf op eertrike, Soe hoghe gheboren noch soe rike, U dochte dat uus werdich ware;
[Folio 216rb]
U herte dat vlieght ghelijc den are Boven alle minnen crachte. 420[regelnummer] Het en mach niet comen in u ghedachte, Hets al sceren dat ghi segt. U herte soe vol hoeverde stect, Die vrouwen en moghen ane u niet winnen. Die hertoghe. Och edel oem, wilt mi versinnen, 425[regelnummer] Dat ic soe dommelike sprac, Dat quam daer bi dat mi ghebrac Wetentheit in rechter trouwen. Nu comic te ghenaden allen vrouwen Om ene, die mi quelen doet; 430[regelnummer] Want herte ende sin, ziele, lijf ende moet Staet al in eenre joncfrouwen ghewelt. Gheraert. Wie es die joncfrou, die u dus quelt, Gloriant neve, laet mi dat weten. Want ic en can emmer niet vergheten 435[regelnummer] Der hogher woerden die ghi spraect; Ende sidi nu ane ene minne gheraect, Seker, neve, dat wondert mi. Segt mi doch, wie se si, Die u herte alsoe beswaert. Die hertoghe. 440[regelnummer] Van Normandiën oem Gheraert, Si heet Florentijn van Abelant, Edel oem, coen wigant, Ende heeft enen vader van hoghen doen, Dats van Abelant die rode lioen 445[regelnummer] Es haer vader, des sijt wijs. Gheraert. Hulpt, here god vanden paradijs, Neve, hoe mach dat comen bi? Dat heeft mire herten alte vri, Om dat si woent soe verre van hier. Die hertoghe.
[Folio 215va]
450[regelnummer] Och, edel oem, der minnen vier Es snelder vele dan enech ghescot. Oem Gheraert, bi minen god, Si heeft mi een saluut ghesent Ende een anschijn na thare gheprent, 455[regelnummer] Ghelijc den haren ene figure. Si es die scoenste creature, Die leeft onder des hemels trone; Si ware wel weert te spannen crone, Al waert een coninc van Vranckerijc. 460[regelnummer] Sie en es gheenre vrouwen ghelijc, Die die sonne nu bescijnt. Al es mijn herte van hare ghepijnt, Seker, oem, si eest wel weert, Si es van hare doghet vermeert 465[regelnummer] Ende oec van haren hoghen moet. Och, edel oem, ic maects u vroet, Minen verborghen heimeliken staet. Nu biddic u, oem, gheeft mi raet, Dat ic mijn lief ghewinnen mach. Gheraert. 470[regelnummer] Gloriant neve, dien dach En mach u nemmermeer ghescien; Ghi moghet wel om een ander sien. Ic sal u segghen redene waer bi: Die rodelioen hi es soe vri 475[regelnummer] Ende een man van groter machte, Ende die oec haet al ons gheslachte Boven al die leven op die eerde; Want ic versloech metten sweerde Sinen vader voer Abelant, 480[regelnummer] Ende u vader, die coene wigant, Versloech sinen oem Eysenbaert, Die vroemste man, die nie ghewaert, Ende in heydenesse gorde sweert, Maer u vader wide vermeert 485[regelnummer] Sloech hem den hals ontwee. Noch dede hi hem scade mee, Daer hi noit sint omme en loech: Twee sijnre moien kindere hi versloech, Die uut Antiotsen waren gheboren. 490[regelnummer] Dies heeft die rodelioen noch toren, Dat wetic wel ghewaerlike.
[Folio 216vb]
Al waerdi here van al kerstenrike, Hine gave u sijnre dochter niet. Die hertoghe. Bi gode die hem crucen liet, 495[regelnummer] Oem Gheraert van Normandiën, Ende bider maghet sente Marién, Ic salse hebben of bliven doot, Al ware hi mijn viant noch alsoe groot, Ende daer toe van hoger macht. 500[regelnummer] Behendicheit gaet voer cracht. Ic sal ghewinnen die vrouwe rene; Met minen properen live allene Meinicse te halene, ans mi god. Gheraert. Gloriant neve, al sonder spot, 505[regelnummer] Ende hoe wildi dat leggen an? Die hertoghe. Dat salic u segghen, edel man Van Normandién, coene wigant. Ic sal riden ombekant Ghelijc enen ridder van avonturen. 510[regelnummer] Der minnen pas moetic besuren; Dat doet al Florentijn die scone joncfrouwe. Och, edel oem, nu blijft ghetrouwe Den goeden lande van Bruuyswijc; Want van vromicheiden uus ghelijc, 515[regelnummer] Edel oem, nu niet en leeft. Ic bidde u, dat ghi niet en begheeft, Ghine sijt ghetrouwe den goeden lande Ende verwaert al omme mijn scande; Dies biddic u, edel oem Gheraert. 520[regelnummer] Eest dat ic doot blive op die vaert, Soe es u verstorven dlant. Nu blijf met gode, coene wigant, Dese vaert moet ghevaren sijn. Gheraert. O Gloriant, neve mijn,
[Folio 217ra]
525[regelnummer] Ic duchte, dat u dese vaert sal rouwen. Men vint soe vele scoender vrouwen In kerstenheit, hoghe baroen. Hi es soe fel, die roede lioen, Ic weet wel, kint hi u gheslachte, 530[regelnummer] Om dwonder, dat u vader wrachte Voer Abelant onder die sine, Hi sal u beraden pine; Seker, neve, dit duchtic al. Die hertoghe. Nu comer af datter af comen sal, 535[regelnummer] Dese vaert moet emmer sijn gedaen. Gheraert. Soe moetse u te goede vergaen, Dies biddic gode vanden trone, Gloriant neve, dat u god lone! Nu sijt behindich in uwen raet, 540[regelnummer] Ende uwen heimeliken staet En seldi niemen maken cont, Ende luttel worde in uwen mont Ende die behindich ende vast; Ende als ghi comt daer u herte op rast, 545[regelnummer] Tot Florentijn, die vrouwe goet, Soe draght heerlijc uwen moet Ende en sijt emmer te haestich niet; Eest dat ghi comt in enich verdriet, Doeghet mi te wetene, neve mijn, 550[regelnummer] Ic sal seker u vader sijn Alsoe langhe als mi god behout mijn lijf. Maer lietti dese vaert een blijf, Soe dadi als die vroede doet. Die hertoghe. Nenic, oem, om al dat goet, 555[regelnummer] Dat die sonne nu mach bescinen, Sone latic niet, ic en sal Florentijnen Bescouwen, dat edel wijf. Waer es mijn ors Vaelentijf? Ic wil gaen varen metter spoet. 560[regelnummer] Maer, edel oem, ghetrouwe ende goet, Ic set mijn lant in uwer gheweelt,
[Folio 217rb]
Dat ghijt trouwen bewaren seelt, Tote dat ic come van Abelant. Gheraert. O edel neve Gloriant, 565[regelnummer] God ons here moet u bewaren Ende altoes in doghden sparen, Waerwaert dat ghi u bekeert. Die hertoghe. Ay god, hoe sere mi die minne leert Hovescheit, dat vindic nu wel. 570[regelnummer] Mijn herte stont tot allen vrouwen fel, Eer ic minnende wert die scone. Maer nu spannen alle vrouwen crone In mijn herte: dat doet allene Florentijn die vrouwe rene, 575[regelnummer] Die mi leert gaen der minnen ganc. O overste god, die minne u dwanc, Dat ghi van boven neder quaemt Ende menschelijc nature anenaemt; Ane ene maghet, een suver wijf, 580[regelnummer] Onfingdi menschelijc lijf, Dat ghi liet hanghen ane een hout Sonder verdiente ende buten scout Ende u edel herte opbreken, Met eenre ghelavie al doersteken; 585[regelnummer] Dat dede al der minnen cracht. Ay god, wat wonder hebdi ghewracht Ende al uut rechter minnen vloet! Daer omme die haers sins sijn vroet, Dien doerven mi begripen niet, 590[regelnummer] Dat mi die minne doet verdriet; Want die minne es soe crechtich, Dat si den starken god almechtich Vanden hemel neder dede dalen, Om die scout vore ons te betalen. 595[regelnummer] Dat dede al der minnen aert, Dat hi vercoes den edelen bogaert, Mariën, dat edel vat, Daer in verborghen was die scat, Die ons allen heeft ghecocht 600[regelnummer] Ende uter ewegher pinen brocht. O minne, du best een edel cruut,
[Folio 217va]
Du best dat alder soetste fruut, Dat god op eerde nie wassen dede. Nu sie ic Abelant die scone stede, 605[regelnummer] Daer in dat woent die vrouwe mijn. Maer si dunct mi besloten sijn; Hets recht, hets twee uren in der nacht; Ic soude gheloven dat mense wacht: Daer goede hoede es, daer es goeden vrede. 610[regelnummer] Abelant, Abelant, wel soete stede, Na dien dat ic niet inne en mach, Soe willic beiden tote merghen dach Ende minen nacht raste hier gaen doen, Ende Vaelentijf sal gaen weiden int groen, 615[regelnummer] Tote opgaet dat sonneschijn. Florentijn die maghet. Danc hebbe Mamet ende Apolijn, Ic sie den valke van hogher aert Neder dalen in minen bogaert, Daer ic soe langhe na hebbe ghewacht; 620[regelnummer] Hi heeft een teken vore hem bracht, Daer ane dat ickene kinne. Hi es dien ic met trouwen minne, Dat sie ic wel ane sine ghedaen. Nu willickene vriendelijc gaen ontfaen, 625[regelnummer] Want hi es comen te mire hant, Een edel valke uut kerstenlant, Van Bruuyswijc die hoghe baroen. Ic sachen neder beten int groen Van sinen paerde, die coene wigant. 630[regelnummer] Sijt willecome, Gloriant! Ghi hebt beseten die herte mijn. Ic sach u onder dat maenschijn Ende oec verhoerdic uwe tale; Al te hant verkindic u wale 635[regelnummer] Biden teken, dat ghi daer dracht. Die hertoghe. O Florentijn, wel scone maght, Sidi dit, wel edel vrouwe rene, Soe biddic gode van Nasarene, Dat hi beware u reine lijf.
[Folio 217vb]
640[regelnummer] O Florentijn, wel scone wijf, Wat hebbic al doer u besuert Ende mi gheaventuert, Eer ic hier comen ben int lant! Florentijn die maghet. O edel hertoghe Gloriant, 645[regelnummer] Ghi sijt mi groet willecome! Ghi moghes wel draghen uwen roeme, Dat ic op eerde nie man en sach, Die mijn herte verhoghen mach Meer dan ghi, hoghe baroen. 650[regelnummer] Maer wijst mijn vader, die roedelioen, Dat wi hier beide vergadert sijn, Bi minen god Apolijn, Onser beider lijf dat ware verloren! Die hertoghe. God, die vander maghet was gheboren, 655[regelnummer] Moet onser beider hoeder sijn, O uutvercoren Florentijn, Spieghel boven alle wiven, Saelt verloren moeten bliven, Dat ic hebbe doer u ghedaen? 660[regelnummer] Ic hebbe mijn lantscap laten staen Om u te sprekene, vrouwe rene, Ende come aldus ghedoelt allene Ghelijc enen aermen knecht. Florentijn die maghet. O Gloriant, dat ware onrecht, 665[regelnummer] Bi minen god Tervogan. Hets recht, wie enen doghden an Ende in rechter trouwen mint, Dat hi troest daer af ghewint, Alsoe ic van u hebbe ghedaen. 670[regelnummer] Nu seldi oec van mi ontfaen Al dat u edel herte begheert In reinen aerde, ridder weert, Al sonder eneghe doerpernie. Die hertoghe.
[Folio 218ra]
Bider maghet sente Marie, 675[regelnummer] Florentijn wel suverlike, Om al dat goet van eertrike En dadic u ghene doerperheit. Maer, edel wijf, maect u bereit Met mi te Bruuyswijc te varen, 680[regelnummer] Want hier en es gheen langher sparen. Vernaemt uw vader, die roedelioen, Hi soude ons beiden lachter doen, Soe bleven wi ewelijc ghescant. Florentijn die maghet. O edel hertoghe Gloriant, 685[regelnummer] Bruuyswijc soudic gherne besien, Mochte mi dat met trouwen ghescien, So woudic varen daer ghijs begheert. Die hertoghe. O Florentijn, vrouwe weert, Die ic boven alle vrouwen minne, 690[regelnummer] Ic sal u maken hertoghinne Van Bruuyswijc, den goeden lande; Dies settic u mine trouwe te pande, Edel wijf van hogher aert. Florentijn die maghet. Soe salic met u bestaen die vaert, 695[regelnummer] Boven alle man, die leven mach, Of die ic met oghen nie ghesach, Edel hertoghe, hoghe baroen. Nu laet ons hier neder sitten int groen, Tote neder gaet dat maenschijn; 700[regelnummer] Dan selense alle gader slapen sijn, Die te mijns vader hove behoren, Dan moghen wi sonder toren Varen sonder yemens gemoet. Die hertoghe. O edel wijf, het dunct mi oec goet, 705[regelnummer] Want die vaec gaet mi soe an, Dat ic niet langher ghestaen en can, Ic moet emmer legghen mijn hoet.
[Folio 218rb]
Florentijn die maghet. Soe legghet dan neder in minen scoet Ende slaept, hoghe gheboren wigant; 710[regelnummer] Dan selen wi rumen Abelant. Floerant des roedelioens neve. Hulpe, Mamet ende Apolijn, Hoe es die joncfrou Florentijn Alsoe dommelijc ghesint? En wert nie man van hare gemint, 715[regelnummer] Die in heydenesse mochte spannen crone, Soe hoghe gheboren noch soe scoene, Dat si haer herte daer woude legghen an, Ende mint nu enen kerstenen man Ende wilt met hem rumen dlant! 720[regelnummer] Soe blijft si ewelijc ghescant, Eest dat ic swighe hier van. Bi minen god Tervogan, Nenic, ic saelt segghen haren vader, Want ict ghesien hebbe al gader. 725[regelnummer] Waer sidi, hoghe gheboren baroen Van Abelant, heer roedelioen? Staet op, hoghe gheboren man, Doet haestelijc u cleder an, Ghi selt vernemen, dies ghi niet en wet. Die roedelioen. 730[regelnummer] Nu benic hier al onghelet, Floerant neve, wat saels ghescien? Floerant. O edel oem, ic hebbe ghesien Wonder ane Florentine die scoene, Die met rechten mochte dragen crone 735[regelnummer] Van Babeloen den soudaen. Si leghet aerm ende aerm bevaen In ghenen boegaert, coene wigant, Met enen man uut kerstenlant, Van Bruuyswijc die hertoghe vri. 740[regelnummer] Ic salse u wisen, comt met mi, Edel wigant, wide vermeert, Want ic hebbe hem ghestolen sijn sweert,
[Folio 218va]
Daer hi leghet bi dat edel wijf, Ende sijn ors, dat heet Vaelantijf, 745[regelnummer] Dat hebbic hem heymelijc ghenomen. Uut Bruuyswijc soe es hi comen Ende es een hertoghe daer van. Nu siet, hoghe gheboren man, Waer dat hi leghet in haren scoet. Die roedelioen. 750[regelnummer] Ay, dat heeft mi wonder groet Van mijnder dochter Florentijn. En was nie soe edelen Serrasijn, Daer si haer herte wilde legghen an, Ende leghet nu met enen kerstenen man, 755[regelnummer] Die niet en es van onser wet. Ay, waer toe si haer heeft gheset, Ende alsoe jammerlijc ghescant! Bi minen god Tervogant, Si sal daer omme berren in een vier, 760[regelnummer] Ende die hertoghe en sal niet van hier Mi ontriden, ic en salne vanghen Ende ane enen boem doen hanghen, Bi minen god Apolijn. Gawi, Floerant neve mijn, 765[regelnummer] Ende laet ons vanghen den hogen baroen! Floerant. O edel oem, dat hebben wi goet te doen, Want hi es van wapen bloet. Staet op, hoghe gheboren ghenoet Van Bruuyswijc, coene wigant! 770[regelnummer] Ghi selt besitten Abelant, Die soete stede, dat scoene yuweel; Daer staet verborghen een casteel, Daer seldi werden casteleyn. Het staet op soe scoene pleyn, 775[regelnummer] Dat men dies ghelike niet en vint. Die hertoghe. Van gode soe moetti sijn ghescint, Fel Sarrasijn, vul keytijf! Bi mijnder wet, het cost u dlijf,
[Folio 218vb]
Dat ghi mi heden quaemt soe bi. Floerant. 780[regelnummer] O edel here van herten vri, Laet sinken uwen hoghen moet: Hoghen roem en was noit goet. Want ghi moet verwonnen bliven, Ende daer toe salmen u ontliven, 785[regelnummer] Want ghi hebt die doot verdient. Die hertoghe. Ay mi, dit spel es mi ontsient, Want ic hebbe mijn sweert verloren. God, die van der maghet was gheboren, Moeten bedroeven, diet mi nam 790[regelnummer] Ende al heimelijc tote mi quam, Daer ic in groter vrouden lach. Met rechten ic dat wel claghen mach Dat ic verloren hebbe minen brant. Bi mijnder trouwen, haddicken in mijn hant, 795[regelnummer] Ghine sout mi niet vangen, fel keytijf! Die roedelioen. Her hertoghe, laet dese worden een blijf, Uwen overmoet wert nu ghevelt. Ic mene dat ghijt becopen selt, Dat u vorders hebben ghedaen. 800[regelnummer] Voer Abelant sachic verslaen Minen vader van uwer partiën; Dat dede Gheraert van Normandiën, Versloech den lieven vader mijn, Ende u vader, bi Apolijn, 805[regelnummer] Versloech minen oem Eysenbaert Ende twee ridders van hogher aert, Mijnder moien kindere, als ghi moget horen, Uut Antiotsen waren si gheboren, Versloech u vader met sijnder ghewelt. 810[regelnummer] Ic mene, dat ghijt becopen selt, Bi minen god Apolijn, Ende mine dochter Florentijn Salic leveren doen den brant.
[Folio 219ra]
Die hertoghe. Och edel here van Abelant, 815[regelnummer] Doet met mi dat ghi begheert; Maer Florentijn, die es wel weert Te draghen crone voer elken man; Want biden vader, die mi ghewan, Si heeft te male een reine lijf, 820[regelnummer] Si en was noch noit niemans wijf, Dat wetic wel, te gheenre uren, Si es ene edel creature; Sijt haers ghenadich, hoghe baroen! Die roedelioen. Bi minen groten god Mahoen, 825[regelnummer] Dan lietic om al die werelt niet; Si sal daer omme bernen, wats gesciet, Dat si nie groete van u ontfinc. Die hertoghe. Ay, gheweldich hemels coninc, Nu bewaert dat edel wijf; 830[regelnummer] Al eest dat ic verliese mijn lijf, Bewaert die scoene Florentijn; Dies biddic u, werde sceppere mijn, Dat si die doot mach ontgaen Ende kerstenheit moet ontfaen; 835[regelnummer] Dies biddic u, moeder ende maeght, Want si een reine herte draeght Ende heeft te male ene edel nature, Moeder gods, bewaert die scoene creature. Dies biddic u, god, doer uwen oetmoet, 840[regelnummer] Want gherechte minne ons beiden doet, Dat wi sijn in dit verdriet. Ay god, nu en wilt vergheten niet, Dat u die minne daer toe dwanc, Dat ghi ane ene wigaert ranc 845[regelnummer] Ontfinc menschelijc nature: Dat was Maria, die maghet pure, Die u ontfinc in reinen live, Dat noit en ghesciede ghenen wive, Ende maghdelijc ter werelt bracht; 850[regelnummer] Dat dede al die minne cracht; Ende daer na stoerfdi die bitter doot,
[Folio 219rb]
Om ons te bringhen in vrouden groet; Soe brinct mi noch uut desen prisoene. Florentijn die maghet. Waer sidi, Roegier, deghen coene, 855[regelnummer] Mijn lieve vrient ende ghetrouwe? Rogier. Ic ben hier, wel edel vrouwe. Nu segt mi, wats die raet? Florentijn die maghet. Ay Rogier, al minen toeverlaet Die steet al te male ane di. 860[regelnummer] Och lieve Rogier, nu segt mi, Wat seet mijn vader, die hoghe baroen? Rogier. Och edel vrouwe, bi Mahoen, Hi heeft gheswoeren op sinen tant, Dat hi sal hanghen den hoghen wigant 865[regelnummer] Ende u leveren sal ten viere; Dat heeft hi gheswoeren alsoe diere, Dat mens hem wel gheloeven mach. Dies en benic ure, noch nacht no dach, Sonder droefheit, edel vrouwe. Florentijn die maghet. 870[regelnummer] Och edel Rogier, nu sijt ghetrouwe, Want ghi hebbes wel die macht. Ic weet wel, dat ghi den kerker wacht, Daer die hertoghe in leghet ghevaen. Nu wilt hem in staden staen, 875[regelnummer] Dat hi behouden mach sijn lijf. Rogier. Och edel uutvercoren wijf, Doe ic dat, soe ben ic doot; Al die werelt van goude roet En sal mi connen ghehulpen niet.
[Folio 219va]
Florentijn die maghet. 880[regelnummer] Rogier, hulpt mi uut mijn verdriet Ende oec den hertoghe Gloriant, Dan selen wi rumen Abelant Ten lande wert van Bruuyswijc. Rogier, ic ghelove u sekerlijc, 885[regelnummer] Ic sal ewelijc sijn u vrient. Rogier. Och edel vrouwe, dies hebdi wel verdient Over meneghen tijt hier te voren. U vader hadde eens mijn doot ghesworen, Doen waerdi al minen toeverlaet. 890[regelnummer] Ach, nu dadic als een quaet, Soudic dies alnu vergheten. Al soudic in vieren werden ghespleten, Ic sal u hulpen, wel edel wijf, Dat ghi behouden selt u lijf 895[regelnummer] Ende oec die hertoghe van Bruuyswijc, Want hi ontfinc mi soe vriendelijc, Doen ic hem van u die boetscap bracht. Ic sal daer om pinen dach ende nacht, Edel vrouwe van herten reen, 900[regelnummer] Ic sal ontsluten die kerker steen Ende verloessen die hoghe wigant. Waer sidi, her Gloriant, Edel hertoghe, hoghe baroen? Comt uut desen swaren prisoen, 905[regelnummer] Want alle die slote sijn ontdaen. Die hertoghe. Wie heeft mi dese gratie ghedaen? Rogier vrient, berecht mi dat. Rogier. Florentijn dies mi bat, Dat ic u holpe uut uwen verdriet. Die hertoghe.
[Folio 219vb]
910[regelnummer] Ay, god die hem crucen liet, Die moets hebben lof ende danc, Dat ic ben uut desen swaren stanc, Daer ic soe langhe in hebbe ghesijn. Nu segt mi: waer es Florentijn, 915[regelnummer] Die overscoene creature? Rogier. O edel here, si leghet tusschen vier muren Ghesloten ende vaste ghevaen; Te hare soe en mach niement gaen, Want haer vader wiltse ontliven. Die hertoghe. 920[regelnummer] Dien wille sal achter bliven, Op dat mi god behout mijn lijf; Ic sal verlossen dat edel wijf, Eer ic scheden sal van hier. Och, haddic minen desterier 925[regelnummer] Valantijf metter hant Ende mijn sweert, den goeden brant, Soe wildic Florentijnen halen Ende den roeden lioen betalen Sijn huushure in rechter trouwen! 930[regelnummer] Het sal hem sekerlike rouwen, Dat hise soe jammerlijc hout gevaen. Rogier. Here, ic wijls u te hulpen staen Ende met u varen uten lande. Mamet willic doen die scande, 935[regelnummer] Dat ic wille kerstenheit nemen an. Nu siet hier, hoghe geboren man, Valantijf, u goede paert, Ende uwen brant, dat goede swaert, Daer u herte soe sere op rast. Die hertoghe. 940[regelnummer] Ay, nu haddic minen last, Haddic Florentijne die scoene. Lieve Rogier, dat u god loene,
[Folio 220ra]
Nu wijst mi die kerkersteen, Daer in dat leghet die maghet reen; 945[regelnummer] Ic salne ontsluten ende ontdoen, Ende werdes gheware die roedelioen, Seker, ic gheve hem sijn payment. Rogier. Ay here, soe waren wi ghescent, Worde dit hof met allen ghestoert. 950[regelnummer] >Ic sal ons vele bat hulpen voert: Ghi selt hier houden in dit groen, Ende ic sal gaen ten roeden lioen Ende sal hem segghen ende maken vroet, Dat hi morghen metter spoet 955[regelnummer] Florentijn, dat edel wijf, Sal doen dooden ende nemen dlijf. Dies salic hem maken wijs, Ende ghi selt hier houden in dit rijs Ende emmer seldi op die waerden sijn. 960[regelnummer] Als men uut brinct Florentijn Ende mense ontliven sal, Dan seldi comen over al Ghereden, hoghe gheboren wigant. Bi minen god Tervogant, 965[regelnummer] Ic sal u ter hulpen staen. Ghi selt steken ende ic sal slaen, Ende god sal in onser hulpen sijn. Aldus selen wij Florentijn Verlossen, dat edel wijf. Die hertoghe. 970[regelnummer] Rogier, het sal mi costen dlijf, Ofte ic bringse uut hare noet. Nu gaet henen met haesten groet; Ic sal hier bliven in dit foreest. Ay vader, sone ende heilich geest, 975[regelnummer] Nu moetti bewaren Florentijn. Rogier. O Mamet ende Apolijn Ende Mahoen ende Tervogant, Edel here van Abelant, Die moeten u gheven goeden dach.
[Folio 220rb]
Die roedelioen. 980[regelnummer] Rogier, nu doet mi ghewach: Hoe salic varen met Gloriant? Rogier. Edel here van Abelant, Dat salic u segghen ende maken vroet, Dat ghi morghen metter spoet 985[regelnummer] Florentijn, dat felle wijf, Dooden selt ende nemen dlijf, Want si hevet wel verboert, Als ment recht na rechte coert, Want si heeft onse gode ghescant; 990[regelnummer] Ende dan seldi Gloriant Hanghen doen ane enen boem. Want vernaemt Gheraert sijn oem, Dat hi hier ghevanghen leghet, Here, voer waer si u gheseghet, 995[regelnummer] Soe sal hi comen met groter cracht Ende met al sijnder macht Ende sal ons doen grote pijn. Daer omme duncket mi dbeste sijn, Dat ghise beide ontliven doet. Roedelioen. 1000[regelnummer] Rogier, desen raet dunct mi goet. Nu en willic beiden dach noch ure. Gaet henen, haelt mi die scoene figure, Florentijn, die felle pute; Ic salse doen leiden ter poerten ute 1005[regelnummer] Ende doen haer thoeft afslaen. Rogier. Here, dit dunct mi dbeste gedaen. Ic salse halen, bi Apolijn. Waer sidi, scoene Florentijn? Ghi moet gaen voer den hoghen baroen, 1010[regelnummer] Uwen vader, den roeden lioen. Hi wilt met u justicie houden Ende meint, dat u sal werden vergouden, Dat ghi sine gode hebt ghescant Ende dat ghi bi Gloriant
[Folio 220va]
1015[regelnummer] gheslapen, vri edel wijf. Dat sal u costen u edel lijf, Want hi hevet soe dier ghesworen. Florentijn die maghet. God, die vander maghet was gheboren Ende sijn voetsel van haer soeghede, 1020[regelnummer] Ende daer na dat hi ghedoeghede, Datten die felle joden vinghen, Ende aen enen cruce hinghen, Daer hi an sterf die bitter doot, Om ons te bringhen in vrouden groet, 1025[regelnummer] Die moet mine ziele ghenadich sijn. Die roedelioen. Nu segt mi, dochter Florentijn, Wie mach u hier toe hebben bracht, Dat ghi sijt aldus bedacht Ende aenbedt enen vremden god 1030[regelnummer] Ende maect met onsen gode u spot, Ende mint daer toe enen kersten man? Bi minen god Tervogan, Ghi selt daer omme u lijf verliesen. Florentijn die maghet. Vader, die doot willic gerne kiesen 1035[regelnummer] Om den ghenen, diese doer mi ontfinc Ende naect ane een cruce hinc Met sinen aermen wide ontdaen, Ende liet hem hande ende voete doerslaen Met plompen naghelen drie. 1040[regelnummer] Ghewarich god, so moetti mie Bescermen vander hellen brant, Ende bewaert den hertoge Gloriant, Want hi es in pinen groet. O edel hoghe gheboren genoet, 1045[regelnummer] Hoe gerne haddic u noch ghesien! Maer en mach mi niet ghescien, Dat doet mijnre herten alte wee.
[Folio 220vb]
De hangdief. Dien moghdi scouwen nemmermee, Hoghe gheboren edel wijf, 1050[regelnummer] Want ic u nu sal nemen dlijf, Dat deert sere die herte mijn. Och edel joncfrouwe Florentijn, Waer toe hebdi u gheset? Woudi noch anebeden Mamet, 1055[regelnummer] Ghi sout noch wel u lijf behouden. Het comt al touwe bi uwen scouden, Dat ghi onsen gode aldus blameert Ende u selven scandeleert, Ende ghi hoghe gheboren sijt. Die roede lioen. 1060[regelnummer] Ghi gheeft haer alte langhe respijt. Haestu ende slaet haer af thoet, Want hare mesdaet es soe groet, Al die werelt en holpe hare niet. Die hertoghe. Bi gode die hem crucen liet, 1065[regelnummer] Dan sal niet wesen, fel tierant! Van gode moetti sijn ghescant, Dat ghi sijt soe putertier. Ter quader tijt maect u van hier, Of die duvel sal uus wouden, 1070[regelnummer] Ende Florentijn sal haer lijf behouden Ende tuwer scande mijn eyghen sijn. O uutvercoren Florentijn! Van deser doot sidi vri. Dies danct der werder maghet Mari 1075[regelnummer] Ende Rogier, den coenen wigant. Florentijn die maghet. Och edel hertoghe Gloriant, Ic dancs gode vanden troene, Dat mi ghevallen es soe scoene, Ende daer naest u ende Rogier. 1080[regelnummer] Och edel here, laet ons van hier Trecken, hoghe gheboren man.
[Folio 221ra]
Die hertoghe. Florentijn, nu varen wij dan Te minen lande van Bruuyswijc. Mijn herte staet in vrouden rijc, 1085[regelnummer] Edel wijf van hogher aert, Nu sie ic den edelen boegaert, Bruuyswijc dat goede lant. O edel oem, coene wigant, Van Noermandiën hoghe baroen, 1090[regelnummer] Nu laet die poerte wide ontdoen Ende laetse incomen met bliden sinne, Die ic met al miere herten minne, Van Abelant die scoene Florentijn. Gheraert. O Gloriant, neve mijn, 1095[regelnummer] Sijt willecome op desen dach, Ende Florentijn, die ic nie en sach Meer dan nu te deser tijt. Mijn herte wert mi van vrouden wijt, Dat ic u sie met ghesonden live 1100[regelnummer] Comen metten edelen wive. Nu segt mi: hoe voerdi in Abelant? Die hertoghe. Och edel oem, coene wigant, Al slapende wardic daer ghevaen Ende in enen kerker ghedaen, 1105[regelnummer] Daer mi met rechte uut mocht verlangen, Want aderen, padden ende slanghen Waren daer mijn naeste ghebueren. Maer god, die gaf mi avonture, Bi vriende hulpe, bi goeden rade, 1110[regelnummer] Dat ic ben comen sonder scade Uut den vangnesse swaer. Het en quam nie man in selken vaer, Maer die minne vanden edelen wive Hielt mi altoes te live, 1115[regelnummer] Dat ic hoepte, het soude beter werden. Aldus hebic met volherden Ghewonnen daer mijn herte op rast.
[Folio 221rb]
Gheraert. Gloriant neve, ghi hebt ghepast Der minnen boegaert leren bouwen. 1120[regelnummer] Maer doch en derft u niet rouwen, Al eest u worden een deel te suere; Ghi brinct hier ene scoene creature, Die oec niet edelre en mochte sijn. Al es haer vader een Sarrasijn, 1125[regelnummer] Hi es een hoghe gheboren man, Want van Babeloen die soudan Was sijn vader, dies benic vroeder, Ende des heren dochter was sijn moeder Van Antioetsen, des benic wijs, 1130[regelnummer] Ende oec heeft haer vader den prijs Voer ende na in tkerstenrijc; Sone es van vromichede sijns ghelijc In heydenesse, die wapen draght; Daer om was ic van u versacht, 1135[regelnummer] Dat u ten quaden soude vergaen. Maer ghi hebt wel ghedaen; Met volherdene hebdi verwonnen. En dochte oec gheen dinc begonnen, Dat men niet volherden en wille. 1140[regelnummer] Nu swicht ende maect een ghestille! Dit voerspel es ghedaen, Men sal u ene sotternie spelen gaen. Nota .xj^c. en/ .xli. vss.

Gloriant

Gloriant

Een abel spel ende een edel dinc van den hertoghe van Bruuyswijc, hoe hi wert minnende des roede lioens dochter van Abelant

Over het gehele werk

titels

auteurs