De C.L. psalmen des conincklijcken propheten Davids


Noch een Avondt Liedt. Christe qui lux es & dies.
Erasmvs Albervs. CHriste ghy zijt die lichte dach, Voor u die nacht niet blijven mach, Ghy licht ons van den Vader her, En zijt des lichtes Predigher. 2. Ach lieve Heer behoet ons doch In dees nacht voor s'vyants bedroch, En laet ons in dy rusten fijn, En voor den Sathan seker zijn.
[Folio CCLiij.v]
3. Of schoon die ooghen slapen fijn, So laet dat herte wacker zijn, Hout over ons dijn rechter handt, Dat wy niet vall'n in sondt en schandt. 4. Wy bidden u Heer Jesu Christ, Behoedt ons voor des Duyvels list, Die steets na onser Sielen tracht, Dat hy aen ons niet hebbe macht. 5. Wy zijn doch u gheerfde goet, Verworven door dijn heylich bloet, Dat was des eeuw'ghen Vaders raedt, Als hy ons dy gheschencket haet. 6. Beveel den Enghel dat hy com, En ons bewaeck' dijn eyghendom, Gheeft ons die lieve Wachters toe, Dat wy voor'n Sathan hebben rue. 7. Soo slapen wy in den naem dijn, Dewijl die Eng'len by ons zijn, Ghy heylighe drievuldicheyt, Wy loven dy in eewicheyt.