De C.L. psalmen des conincklijcken propheten Davids

Psalm. CXXVIII. Beati omnes qui.

Op syn eygen Voys: Als hier nae volget.

[fol.  CLviij.v]

VVEl hem die in Gods vreese staet,
En die op syne Weghen gaet,
Dijn selffs Handt dy gheneeren sel,
So leeft ghy recht, en t'gaet dy wel.

2. Dijn Wijff sal in dijn Huyse zijn
Als een Wijnstock vol Druyven fijn,
En dijne kinder om dijnen Disch,
Als Oly planten gesont end frisch.

3. Siet so Rijck Segen hangt hem aen
So in Gods Vreese leeft een Man,
Van hem laet af den Vloeck en Thoorn
Den Menschen Kindren aen geboor'n.

4. Wt Zyon sal Godt seeg'nen dy,
Dat ghy moecht schouwen staedich bly
T'geluck der Stadt JErusalem,
Voor Godt in g'naden aenghenaem.

5. Bewaren sal Godt t'Leven dijn,
Met syn Goetheyt so by dy zijn,
Dat ghy sult sien dijns Kindes kindt,
En dat Israel Vrede vindt.