De C.L. psalmen des conincklijcken propheten Davids

Psalm. LII. Quid gloriaris in.

Op de Voys: Help Godt hoe gaet het ymmer toe.

WAt trotst ghy op dijn boosheyt doch
Ghy Tyran wreet end' machtich,
Godes barmherticheyt duert noch

[fol.  Lxij.r]

 

Daeg' lijcx sterck end' wel Crachtich.

 

Nae schalcheyt dijn valsch' Tonge tracht

 

Snijt scherper dan een scheermes mach,

 

Bedriecht sonder bekeeren.

 

 

 

2. Het boos bemint ghy meer dan t'goet

 

End' Valscheyt meer dan t'Rechte,

 

Ghy Lieft wat gaet nae dijnen Moet,

 

End' wat verderven plechte,

 

Met valscher Tonghen, dat is waer,

 

Dies sal dy Godt oock gants en gaer,

 

Aff breken end' verstooren.

 

 

 

3. Hy sal dy heel te slaen valiant,

 

End' wter hut wech Rucken,

 

End' uwen Wortel wt het Landt

 

Der Levenden wt plucken,

 

Dat sullen sien d'Oprechten al,

 

Haer vreesen, end' dijn Ongheval,

 

Beschimpen end' Belachen.

 

 

 

4. Siet, dees hielt Godt niet voor syn Macht

 

Verliet hem op syn Goeden,

 

Hy was seer Rijck en groot gheacht,

 

En leefd' in Overvloeden.

 

Hy was machtich om schaed' te doen,

 

Maer ick sal int huys Godes schoon

 

Als een Olijffboom groyen.

 

 

 

5. Want ick verlaet my Eewelijck,

 

Op Gods goetheyt Certeyne,

 

Dy HEER wil Eewich Dancken ick,

 

Ghy maeckt het wel Alleyne.

[fol.  Lxij.v]

 

Op uwen Naem ick wachten sal,

 

Die goet is voor de Heyl'ghen al,

 

Die steedts hem Loven blijde.