Het Christalyne spieghelken
(1630)–Anoniem Christalyne spieghelken, Het–
AuteursrechtvrijOp de wijse: Ons Vader Godt ghepresen.
Den Autheur.
EEn Enghel werdt ghesonden
Van Godt den Heere goedt,
| |
[pagina 21]
| |
Tot een die lach in sonden,
En swam in ‘swereldts vloedt.
Den Enghel.
Sondaer ghy meucht wel beven,
Dat ghy in sonden zijt;
Den Heere sal u begheven,
En korten uwen tijdt.
Den Autheur.
Den sondaer lach alleene,
Hy wierdt verschrickt voorwaer:
Seer ras was hy te beene,
Benouwt soo stont hy daer.
Den Enghel.
Wilt u quaedt leven laten,
De deucht wilt nemen aen:
Neemt Godt tot uwer baten,
Eer u de doodt comt slaen.
Den Sondaer.
Soud’ my de doot bevanghen,
In mijn quaet leven groot?
Och doetse wat verlanghen:
Ick ben van deuchden bloot.
Den Enghel.
Ick en sal u niet laten,
Stelt u in goeden staet:
Mijn woorden wilt wel vaten,
Eer ghy ter aerden gaet.
| |
[pagina 22]
| |
Den Sondaer.
Wat helpt het triumpheren,
Als ick doch sterven moet?
Ick wilt al renonceren,
En soecken t’eeuwich goedt.
Den Enghel.
Och mijne beminde ziele,
En zijt niet wanckelbaer:
Dat u niet en verniele
Het pac der sonden swaer.
Den Sondaer.
Adieu o wereldt schoone,
Ick neme mijnen ganck,
Tot Christus doorne croone,
En tot dat Cruyce lanck.
|
|