Den blijden-wegh tot Bethleem voor de Christelijcke jonckheyt



[pagina 197]
Van de glorie des Hemels.
Op de wijse: Passemede d'Anuers. O Schepper fier, Hoe lustigh om wesen, Daer ghy zijt ghepresen Van d'Enghels inden throon: Wilt ons toch hier Van allen druck ghenesen, Heere uyt ghelesen, Gheeft naemaels sulcken loon; Dat ick u aenschijn mach anschouwen En u gheboden onderhouwen. Heere Iesus soet Gheeft ons dat eeuwigh goet. Wie sou die vreught En blijschap konnen schrijven, Die sy daer bedrijven In Syons schoone pleyn Sy sijn verheught, Om dat sy moghen blijven En altijts beklijven By't Lam Godts suyver en reyn. 't Lammeken doet open ten thoone Den boeck met seven seghels schoone. Heere, &c. Dees stad eerbaer Is schoon boven maten (Aenmerckt) haere straten Zijn van goudt gheblaveyt
[pagina 198]
De Enghels daer Met gulde wieroock-vaten, Loven sonder laten Tot inder eeuwigheyt, En prijsen Godt van hemelrijcke, Met soet lof-sanck ende musijcke. Heere, &c. Die duysternacht Sietmen daer niet regneren: Altijdt triumpheren Godts vrienden claer en schoon: Met groote kracht Sietmense jubileren, En sonder cesseren Singhen met soeten thoon: Daer en ghebreckt Son' noch Mane Noch ander licht by haer te stane. Heere, &c. Prince minioot, Wilt u met vlijt op maken, Bidden ende waken, Op dese vreught toch let: Cleyn ende groot Naer dese stadt wilt haken, Die daer in gheraken Moeten zijn onbesmet: Zy zijn becleet met witte zijde, Loven den Heer' met herten blijde. Heere, &c.