Amoreuse liedekens
(na 1613)–Anoniem Amoreuse liedekens–
AuteursrechtvrijOp de wijse: Vande Vroukens van Haerlem.
TE mey als alle de Vogelkens singhen
De bloemkens uyt der aerden springhen,
Soo denck ick om de soeten
Sal ick nu den bitteren doot
Alleyn besueren moeten.
Den bitteren doot en suldy niet besueren
Ick souder veel liever gaen avontueren
En al op Gods ghenaden
Comt noch tavont daer ick ben
Ick ben tot u gheraden.
Oft ick tavont tot u quaem
En u liefste moeder dat vernam
Die u met herten beminne
Soo most ick uyt den Lande gaen
En comen daer niet weer inne.
Het gincker al op een veynster sluyten,
Hy wasser in, hy en wasser niet buyten
Hy was daer waerlijck inne
Al in een duyster Camerken
Daer speelden zy 't spel van minne.
Snachts ontrent der midder nacht
Als sy op haer eere dacht
Hoe wee was haer te moede
Sal ick nu mijn geel cruyst hayr
Alleyn op binden moeten.
Bint op, bint op u geel cruyst hayr
Ghy zijt van mijn cleyn kinde swaer,
Wat batet langh ghesweghen
Daer ick u gisteren avont om badt,
Dat heb ick nu vercreghen.
Al ben ick van een hont ghebeten
Ick en ben noch niet opghegheten
Hy heeft my laten leven,
Als dat kint geboren is,
Ickt sal den Vader gheven.
Gheeft my dat kint ick salt doen houden
Met silver en rooder Gouden,
Recht of ick waer een Heere,
| |
[pagina 126]
| |
Adieu mijn over soete lief
Strijt altijt voor u eere.
Wat gaf hy dat meysken voor haer eer
Twee hondert gulden min noch meer
En al van rooder goude,
Als dat Kint gheboren is
Zoo sal ick dat selfs doen houden.
Die dit liedeken heeft ghedicht
Dat was een geselleken van harten licht
Hy heeftet wel ghesongen,
Hy heeftet van syn schoon lief gedicht
God schen de nijders tongen.
Hy heeftet gesongen, hy singet wel meer
God geeft den Lantsknecht prijs en eer,
God laet hem verwinnen die schande
Als hy dat Meysjen bedrogen heeft
Soo gaet hy uyt den Lande.
|
|