Amoreuse liedekens

Een oudt Liedeken.
[Myn hertelijck Lief wel schoon Ionck-Vrouwe]

MYn hertelijck Lief wel schoon Ionck-Vrouwe
Ghy zijt certeyn mijn Lief alleyn,
Moet ick u derven soo lijde ick rouwe
Ghy zijt mijn Liefs hertsen greyn.

Als ick dan peynse om u Figuere

Reyn Bloemken jent, seer excellent,
Door amoreusheyt schoon creatuere
Mijn herteken laet ick by u ontrent.

Ghy zijt die liefde in mijn Hert ghepresen

Spijt diet benijdt, 'tmoet immers zijn,
Het is my solaes by u te wesen
Als die liefde geloont mach zijn.

Ghy ziet die liefste int hert gheschapen

Boven Silver, Gout oft Peerlen fijn,
Ick hoope ick sal noch by u slapen
Of Kraey en sal geen Vogel zijn.

Vrou Venus pacxken heb ick gheladen

Ick ben die geen diet dragen moet
Vwer liefde en can ick niet versaden
Ghy syt die gheen dient my doet.

Reyn lieflijck beelde u minnelijck wesen

Verdrijft den couwe van dat herte mijn,
Als ick mach comen al sonder vresen,
Ghy zijt mijn troost mijn medecijn.

Ick hebbe geleert ick sal onthouwen

Hebbe ickt anders wel verstaen,
Dat heete liefde mach wel verkouwen,
Maer reyne liefde sal niet vergaen.

Adieu schrijve ick met droeve sinne

Lief peynst om my als ick om dy,
Mijt quade tongen draecht reyne minne
Mijn herteken laet ick u altoos by.