Amoreuse liedekens

Een oudt Liedeken.
[Een Venus dierken heb ick uytverkoren]

EEn Venus dierken heb ick uytverkoren
Gheen schoonder en weet ick nu terstont
Om haer soo wil ick vreucht oorbooren
Int aensien van haren lachende mont,
Haer keelken wit, haer Borstkens ront,
Maken mijn vrolijck van sinne,
Schoonder en was noyt van Moeder ghebooren
'Tis recht dat ickse beminne.

Ghelijck Gout is haer Hayr van coleure,

Twee Bochskens ter amoreusheyt snel,
Twee Borstkens ront van natuere,
Soo heeft mijn Liefken dat weet ick wel,
Sedich van gheeste ende niet rebel,
Sy is mijn hert een Keyserinne,
Ick en weet ter werelt geen liever creature
Tis recht dat ickse beminne.

Noch heeft sy een hoochmoedige koragie

Ende daer toe een fiere ganck,
Int triumpheeren bedrijft sy ragie
Ick en hoorde mijn dagen noyt soeter sanck,
Als sy bedrijft met haer voys gheklanck,
Het dunckt mijn peur een Goddinne,
Ghefatsoeneert is sy al sy een imagie
'Tis recht dat ickse beminne.

Ic en kan vergeten mijns liefs maniere,

[p. 36]

 

Haer vriendelijck wesen, haer fier ghelaet,

 

Krijgh ick geenen troost tot haer bestieren

 

Soo wert mijn hert heel desperaet,

 

Mocht ick met haer mijn troost mijn toeverlaet,

 

Soo waer ick blijde van sinne

 

Vreucht en solaes soude ick hanteren

 

'tIs recht dat ickse beminne.

 

Princesse goet, die mijn vreuchde doet breken,

 

Al moght ick hebben van Goude swaer

 

'tGewichte van u ick en sal van u niet scheden

 

Ghy blijft mijn liefste wederpaer,

 

Want aen u Liefken weet ick geenen maer,

 

Dan alle vreucht aen u ghewinne

 

Haer wesen reyn en mach my niet verleden

 

't Is recht dat ickse beminne.