Een Aemstelredams amoureus lietboeck


Een nieu Liedeken: Op die wijse: het passeerde een aerdich Medecijn op eenen auont stont. Schoon liefken ient // Seer excelent Ic moets v clagen // Dat ic absent Van v dus blijf ghewent, Dus lijdt mijn Hart torment Van daghe tot daghen.
[pagina 142]
Hoe dicwils wy // Met alle melody, Genoechte bedreuen // Mijn hart was bly Als ick mocht comen by, Schoon liefken aen v zy Door v soet aencleuen. Al waert ic quaet // Haer fier ghelaet Cant al ghenesen // Mijn hart dat vaet Al waert in desperaet Al door v soete praet, Als ghy hebt bewesen. Ick roep o wach // Nacht ende dach Dat ick moet deruen // Die ick aensach Dicwils met soet gheclach, Niet langher spreecken en mach Ick salt besteruen. Waerom Lieff reyn // Soet edel greyn Niet en hebt ontfanghen, Mijn trou alleyn // Die ick v boot so pleyn Wt liefden heel ghemeyn, Hebt laten verganghen. Dat ic niet meer // Mach comen weer, Dat doen die tonghen // Dus ick verteer, Mijn hert in lijden seer Sy houden my heel ter neer, Als een kindeken bedwonghen. Princesse confoort Weest niet verstoort, Wilt v doch keeren // Naer soet accoort, Schoon liefken v toch spoort Onthout van my dit woort, Met duechden en eeren.