Een Aemstelredams amoureus lietboeck

Een Liedeken, Op de wijze: alst begint.

O Venus die Goddinne
Wat hebt ghy in v zinnen,
Om een die ick beminne
Niet can ghewinnen.

Cupido God reale
Troost mijn met uwe Minnestrale
So moghen wy altemale,
Bevrijdt van quale.

Ghy hebt mijn Joncharteken bevangen
Na v staet alle mijn verlanghen
Dus zing ick een droeuighe sanghe,
Betraent van wanghe

Troost mijn schoon Lieueken van rouwe
Op v staet alle mijn betrouwen,
Ghy zijt die fleur der Vrouwen
Schoon int aenschouwen.

Verhoort schoon Lief mijn bitter karmen
Wilt mijn genadich Lief ontfermen
In v sne-witser armen,
Wilt mijn verwarmen.

Laet ons te samen domineren
In een Prieelken triumpheren,
Daer die Vogelkens iubileren,
Sonder cesceren.

[p. 132]

 

Laet ons te samen gaen verblijden

 

In alle Amoreusheyt strijden

 

Spijt haer die dat benijen,

 

Ons melodijen.

 

 

 

Princesse Lieueken verheuen

 

Wilt mijn v Trouweken toch gheuen,

 

So moghen wy sonder sneuen,

 

In vreuchde leuen.