De Vyftien mysterien van den rosen-crans van die H. Maget Maria

Iesus Christus als een twaelf jaerich kindt, vermaent de Godtvruchtige Ionckheyt, tot de Christelijcke leeringhe.

Op de wijs: Ie ne veux plus, o vanité infame.

ICk Iesus, die den Soone Godts almachtich

Des vaders wijsheyt ben,

Maria s'vrucht, Godt ende Mens warachtich

[p. 14]

 

Kom als een kindeken,

 

V Ionghe jeught,

 

Leeren die deught,

 

O kinders fijn, ick sal u meester zijn.

 

Komt al tot my mijn soete lieve kinders,

 

Reyn sieltjens komt tot my,

 

Hoort mijn vermaen, o jong deugd beminders,

 

Die mijn hert maecken bly,

 

Als ick jonck, maer

 

Was twaelf jaer,

 

Merckt dat ick saen, ter kercken ben gegaen.

 

Ick ginck geschickt, met mijn beminde moeder.

 

Maria Maghet schoon,

 

Ioseph ginck me, mijns kintsheyts voogt, en voeder,

 

Gelijck hy was ghewoon,

 

Mijn eerste werck

 

Was inde Kerck,

 

Te sitten stil, en doen mijns Vaders wil.

 

Sy gingen t'huys; ick bleef daer noch dry dagen

 

Mijn ouders ick vergat.

 

Nu hoorden ick, nu dorst ick oock wat vraghen

 

Daer ick int midden sadt.

 

Der leeraers wijs,

 

Elck gaf my prijs,

 

Verwondert seer van mijne jonckheyts leer.

 

Weest oock also, mijn jonckheyt, heel manlerich,

 

Ten Catechismus gaet,

 

V daer wel draegt,

 

Antwoordt en vraeght,

 

V les onthout, d'onwetenheyt oock schout.

 

Den eersten bloem van uwe jonge jaren

 

Eer 't quaet u wert bekent,

[p. 15]

 

Schickt tot Godts dienst, en wijsheyt te vergaren

 

Van jongs wel doen gewent.

 

Want een goet kint,

 

Dat vroech begint,

 

Oock out bewaert zijn deugdenlijcken aert.

 

Ick toonden oock gehoorsaemheyt mijn ouders,

 

Daer ick nochtans was Godt.

 

Leert hier an al, te wesen onderhouders,

 

Van u ouders ghebodt

 

Van mijn kinsheyt,

 

Gehoorsaemheyt,

 

O Kinders leert, u ouders mint, en eert.

 

Druckt my voorts wt in alle goede wercken,

 

Leeft als reyn Engeltjens

 

Datmen mijn deugd mach wtgebeelt bemercken,

 

In soo veel Iesu-kens.

 

Wel aen dan groeyt,

 

V neerstich spoeyt,

 

Ter Salicheyt; die u, o kinders, is bereyt.

FINIS.