Schriftuerlicke liedekens met noch sommighe lofsangen ende ghebeden

[fol. 105r]

[Ghy Christenen wilt verblijden]

Na de wijse: Hubsch maechdelijn, hubsch maechdelijn.

GHy Christenen wilt verblijden
Nu en tot alder tijt
Stelt alle droefheyt bezijden
Want ghy zijt nu bevrijt
Door ^aChristum dierbaer bloet alleene
Zijt ghy ghewasschen van sonden reene
Al die ^bherboren zijt.

Niet ^cwt verganckelicken zade

So ons Petrus doet vermaen
Maer door des woorts Gods rade
So moet gheschieden saen
Hierom wilt u na Gods woort voeghen
Laet u met zijnder ^dghenaden ghenoeghen
Hy en sal u niet versmaen.

Hy sal u ^eteghen comen

Al inder middernacht
Als eenen Bruydegom vrome
Hierom weest inde wacht
Ende laet u lampen branden
Dat ghy niet en coemt tot schanden
So en wort ghy niet veracht.

Dus ^felck wil hem bereyden

Die met den Bruydegom wil ingaen
Want hy en sal niet verbeyden
Dat de dwase om olie gaen
En al roepen sy ^gHeere, Heere
So sal hyse van hem keeren
Hy en salse niet ontfaen.

Waect ^hen bidt tot allen tijden

Ghy Christenen alghemeyn
En wilt het quaet vermijden
Want ghy en weet certeyn
Geenen sekeren ⁱtijt noch ure
Wanneer de Heer sal comen puere
Dus blijft by zijn woorden reyn.

a Apoc.1.3, 5.9.

b Ioan.3.3.

c 1.Pet.1.23.

d 1.Cor.12.9

e Mat.25.6.

f Mat.25.10

g Matt.7.21.

h Mat.25.13
Marc.13.33.
Luce 12.40.

i 1The.5.1.