Een nieu Guese liede boecxken
(1576)–Anoniem Een nieu Guese liede boecxken–
AuteursrechtvrijOp de wijse, Wilhelmus van Nassouwe.Vvaeckt op ghy Nederlanden
Waeckt op tis meer dan tijt
Of ghy comt oock in schanden
Dus siet wel toe subijt
En wilt met den Prins ghetrouwe
Veriagen t Spaens ghebroet
Of ghy brengt v in rouwe
Ja om lijf ende goet.
Wilt toch nemen exempel
Aen Antwerpen playsant
Dwelck was Europus Tempel
Van Neering triumphant
Haers ghelijck is noyt gheuonden
Van Coopmanschappen schoon
Wat wiltment veel vermonden
Het was des Werelts croon.
Van Oosten ende Westen
Js daer tgoet inghebracht
Gout siluer vanden besten
| |
[Folio 136r]
| |
Ghesteenten vol van cracht
Damasten en Fluweelen
Die zijn daer seere ghemeen
Ja Ringhen en Juweelen
Achten sy daer oock cleen.
Oock canmen wel aenmercken
Haer Rijckdommen groot
Aen Huysen ende Kercken
Die daer ghebout staen bloot
Tstadthuys mach ick wel noemen
Met twee Borsen incluys
Vanden Pandt mach ick wel roemen
En oock van d Oosters huys.
Maer hoe sydy gheuallen
O Coninclijcke stadt
V Neeringhen die smallen
V huysen ligghen plat:
Dit heeft ghedaen den Vader
Der Tyrannen verwoet
Ducca Dalf een Spaens verrader
Gierich naet Christen bloet.
Doen hy v heeft ontstolen
Die Croon al van v hooft
En maeckten de moorders holen
Die v nu hebben berooft
Veel sachmen doen singhen
Van vreuchden Neros liet
Die nu oock moeten springhen
En sitten int verdriet.
Jnde maent na October
| |
[Folio 136v]
| |
Jn Nouember den vierden dach
Wert ghy bespronghen sober
Doort tCasteel sonder ghewach
Met twee duysent Soldaten
Vanden Antechrist verwoet
En noch twee hondert pyraten
Te Peert zijt dit wel vroet.
Dese Spaensche bloethonden
Hebben v bestormt fel
Soo dat sy daer deurwonden
Menich redelick gesel
Die v wilden beschermen
Als een maghet eerbaer
Maer Godt moet het erbarmen
Uwen val volchden naer.
Doen sy hadden ghecreghen
Die schans teghen haer ghestelt
Doen zijnder so veel versleghen
Datse niet en zijn ghetelt
Het roepen ende crijten
Tot inden Hemel clanck
Van diemer sach doot smijten
Al vande Spaeniaerts stranck.
Kinders en vrouwen clachtich
Sijn daer met hoopen vermoort
Oudt Jonck O Godt almachtich
Waer ist oock oydt ghehoort
Van datter is bedreuen
Vander Spaenschen tyran
En yeghelijck moeste sneuen
| |
[Folio 137r]
| |
Wast oudt ionck wijf ofte man.
Jerusalem clockmoedich
Noch Troyen gheruyneert
En zijn noyt so verwoedich
Noch wreet ghedestrueert
die stadt deden sy branden
Tvolck worpen sy daer in
Met haer bebloede handen
Schoffierden sy niet min.
Veel zijnder doot ghedronghen
Jn desen wreden strijt
Veel oock int water spronghen
En verdroncken subijt
de soldaten vander stede
Worpent geweer inde vest
dwelck sy volchden mede
Omme so tontcomen best.
Oock veel kinders ende vrouwen
Sachmen gaen den seluen gang
Om tleuen te behouwen
Noyt doot en was so strang
schepen vol volcx gheladen
soncken int schelt seer ras
Om dat elck onberaden
Hem salueerden op dat pas.
Veel Heeren zijn ontloopen
desen seer grooten noot
Oock moestent veel becoopen
Met een haestighe doot
| |
[Folio 137v]
| |
Alsoot wel is gebleken
Aende Graef van Ouersteyn
Oock sietmen noch gebreken
Veel Heeren int gemeyn.
Dertich Vendelen knechten
Laghen daer inde stadt
Met duysent ruyters om te vechten
Teghen den Spaengiaerts plat
Die zijnder meest gebleuen
Soo datmen seyt ter noot
Datter wel zijn ghesleghen
Achtien duysent menschen doot.
O Antwerpen verheuen
Merckt wat v is geschiet
Als dat ghy coemt in sneuen
Door truysschen van een riet
Want die v doen dit lijden
Verstaet wel hoe ickt meen
Hadden tot allen tijden
Wel hondert teghen een.
O ghy Wethouders bloetgierich
Hier voelt ghy Godes hant
Ghy woeckenaers onmanierich
En ouerdaders vailiant,
Leert nu Godt eens recht bekennen
Verlaet v boosheyt quaet
Op dat ghy moecht ontrennen
Dat ouer v hooft noch staet.
Oorlof ghy menschen alle
Merckt wel op dit beclach
| |
[Folio 138r]
| |
En roept met groot geschalle
Wee ouer sulcken dach
En wilt v tot Godt keeren
Rijck arm oudt ende groot,
Op dat den Heere der Heeren
Ons houdt wt sulcken noot.
|
|