Een nieu Guese liede boecxken
(1576)–Anoniem Een nieu Guese liede boecxken–
Auteursrechtvrijop de wijse: Den Lustigen Mey Christus playsant.Den dertichsten Mey op Pinxterdach,
Creghen die Vlissinghers wat te doene,
Teghen die van Antwerpen met ghewach,
Ontrent Saftinghen na de Noene,
Sy waren weder gecomen wt,
Maer haer Cruyden waren van geen virtuyt
Dat mochtense wel beclaghen,
Godt woudese ten lestemael plaghen.
Op de Scheld voorby Rommerswael,
| |
[Folio 84v]
| |
Quamen die van Zirickzee aensetten:
Die van Antwerpen sagense altemael,
Riepen, tzijn vrienden om ons te ontsetten
Daermede waren sy in een Val,
Want die van Vlissinghen met groot getal,
Den Hont quamen aendringhen,
Sy conden na Antwerpen niet weder springen.
Papou wel vierendertich int getal,
Wel ghemonteerde schepen,
Met die te Lilloo laghen al,
Sy waren daer metten andren benepen,
Tgrof gheschut gaf soo grooten geluyt,
Die Vlissingers riepen: Dit is onsen Buyt
Clamp aen, clamp aen als mannen,
Papou stont oft bescheten waren de handen.
Op Pinxterdach eert doncker wert,
Creghen sy met vrome daden,
Elf Schepen met vroom ghemoet en hert,
Voor de Vyant was gheen ghenaden!
Tzy Duyts, Spaeniaert ofte Wael,
Sy spoelden haer de voeten altemael,
De reste gingen sy besetten,
Om des morghens haer tanden aen te wetten.
Pinxter Maendach smorgens vroech,
Waren de Vyanden meest al verloopen,
Negen maecte haer coers recht als een ooch
Tantwerpen was al haer hoopen,
De ander lieten sy inde Pan,
Maer sy warender meest al daervan,
Met haer Bootkens daer wt gheuaren,
| |
[Folio 85r]
| |
Op d'Eylanden sachmen se paren.
De Schaepstallen geheeten zijn
De Eylanden daer sy op sworuen:
Wel achthondert daer op quamen fijn,
Meest van hongher sy daer op storuen:
De ander die daer worden gheuaen,
Jnde Schelde sy moesten te water gaen,
Met de Vloet sy tot Antwerpen dreuen,
Grooten rou inde stadt worde bedreuen.
Vijf inden gront, dry in den lichten brant,
Met vijfthien prijsen quamen sy aensetten
Voor Vlissinghen seer triumphant,
De Heer van Heemstee sonder letten
Vijs Admirael van die Papisten bloot,
Wert gesonden na de Prince minioot,
Hondert twee Metalen stucken,
Sachmen van de Papen schepen rucken.
Oorlof, zijt allegader onuertsaecht,
Al wil Piere de Valetes comen
Wt Spaengien, Godt het seker niet behaecht
Sijn snorcken end hooch beroemen:
Sulcks als hy in Jndien heeft gedaen,
Ende meynt ons oock so te verraen,
Om Hollant en Zeelant te doen steruen,
Ende gants inden gront te bederuen.
Ons Opperste Prins in s Hemels firmament,
Sal onse Nederlant wel beschermen,
| |
[Folio 85v]
| |
Ons tot Slauen te maken sonder ent,
Daertoe sy ons willen brengen ocharmen
Daerom laet ons met hert end moet,
By malcandren opsetten lijf en goet:
Daer sy zijn, sy doch voor ons beuen:
Want Godt zijn Hant ouer haer heeft gheheuen.
|
|